“Yoshlar daftari” jamg‘armalari orqali ijtimoiy yordam ko‘rsatish samaradorligi oshiriladi

O‘zbekiston Respublikasi Prezidenti tomonidan “Yoshlar daftari” jamg‘armalari orqali ijtimoiy yordam ko‘rsatish tizimini yanada takomillashtirish to‘g‘risidagi Farmon (PF–222-son, 20.11.2025 y.) qabul qilindi.

Farmonga ko‘ra, 2026 yil 1 fevraldan belgilab berilgan ijtimoiy yordam turlari Kamabag‘al oilalar reyestriga kiritilgan oilalardagi yoshlarga ijtimoiy shartnoma orqali quyidagi shartlar asosida taqdim etiladi:

— Ta’lim olishni uzluksiz davom ettirish;
— Ta’lim jarayonida ijobiy o‘zlashtirish ko‘rsatkichlariga erishish;
— Volontyorlik faoliyatini amalga oshirish;
— “Besh tashabbus olimpiadasi” doirasidagi loyihalarda qatnashish.

Shartlar bajarilmagan taqdirda qo‘llaniladigan choralar:

— 15 kun ichida ijtimoiy shartnomaning bajarilmagan shartlarini bajarish to‘g‘risida ogohlantirish;
— Ijtimoiy yordam miqdorlarini 15%dan 30%gacha kamaytirish;
— Ijtimoiy yordam ko‘rsatishni 1 oydan 6 oygacha vaqtincha to‘xtatish;
— Ijtimoiy yordam ko‘rsatishni 1 yil va undan ko‘p muddatga to‘xtatish.

Muntazam va yuqori darajada ijtimoiy shartnoma shartlarini 6 oydan ko‘p muddat bajargan yoshlar quyidagicha rag‘batlantiriladi:

— Navbatdan tashqari ijtimoiy yordam ko‘rsatiladi;
— Eng yaxshi 1 000 nafar yosh har yili bir marta BHMning 3 barobari miqdorida pul mukofoti bilan taqdirlanadi;
— Yoshlarning tashabbuskorligi va faolligini rag‘batlantirishga qaratilgan mukofotlarga tavsiya etiladi.

2026 yil 1 fevraldan kamabag‘al oilalar reyestriga kiritilgan oilalardagi yoshlarga quyidagi imtiyozlar beriladi:

— Safarbarlik chaqiruvi rezervidagi harbiy xizmatni bepul o‘tash tartibi joriy etiladi, shu maqsad uchun subsidiyalar ajratish tartibi bekor qilinadi.

— “Yoshlar daftari” jamg‘armalari orqali:
• Avtomototransportlar haydovchilarini tayyorlash o‘quv kurslari xarajatlari qoplanadi (A, B, D va DE toifadagi guvohnoma uchun);
• Kasbiy va oliy ta’lim tashkilotlari o‘quvchi-talabalarining kontrakt summasining 50%gacha qismi ijtimoiy shartnoma shartlarini bajarish darajasiga qarab to‘lanadi va 1 o‘quv yili uchun BHMning 50 barobaridan oshmasligi lozim;
• Bir shaxs 1 yil davomida turli ijtimoiy yordam turlaridan ko‘pi bilan 2 marta foydalanishi mumkin.

Bu o‘zgarishlar yoshlar uchun haqiqiy imkoniyat va ijtimoiy yordam samaradorligini oshiradi.

So‘x tumani hokimligi Axborot xizmati