Mamlakatimizda eʼlon qilingan «Yongʻin xavfsizligi» oyligi doirasida Soʻx tumani favqulodda vaziyatlar boʻlimi xodimlari tomonidan aholi xavfsizligini taʼminlash va sodir boʻlishi mumkin boʻlgan koʻngilsiz hodisalarning oldini olishga qaratilgan keng qamrovli tadbirlar amalga oshirilmoqda.

Tuman markaziy shifoxonasi hududida FVB xodimlari tomonidan tungi vaqtlarda izchil profilaktik tadbirlar tashkil etilmoqda. Ushbu tadbirlardan koʻzlangan asosiy maqsad — fuqarolarning xavfsizligini taʼminlash, turli inshoot va qurilish obyektlarida yongʻin xavfsizligi qoidalariga rioya etilishini nazorat qilishdan iborat.

Tungi reydlar davomida masʼul mutaxassislar tomonidan obyektlar koʻzdan kechirilib, aniqlangan kamchiliklar yuzasidan tushuntirish ishlari olib borilmoqda.

Jumladan:
• Yongʻin xavfsizligi talablariga zid boʻlgan holatlar boʻyicha zudlik bilan koʻrsatmalar berilmoqda;
• Qurilish jarayonlarida tartib-intizomni mustahkamlash va texnika xavfsizligi qoidalariga amal qilish boʻyicha masʼullarga tavsiyalar berilmoqda;
• Isitish moslamalaridan foydalanishda ehtiyot choralarini koʻrish boʻyicha targʻibot ishlari olib borilmoqda.

Mazkur profilaktik tadbirlar aholi gavjum boʻladigan hududlarda yongʻin xavfi yuzaga kelishining oldini olishda muhim ahamiyat kasb etmoqda. Soha mutaxassislarining taʼkidlashicha, bu kabi tungi reydlar oylik doirasida tumanning barcha mahalla va inshootlarida tizimli ravishda davom ettiriladi.

Soʻx tumani hokimligi barcha fuqarolardan yongʻin xavfsizligi qoidalariga qatʼiy rioya qilishni, oʻzlari va yaqinlarining sogʻligʻi hamda mulkiga befarq boʻlmaslikni soʻrab qoladi.

Soʻx tumani hokimligi Axborot xizmati