Kitob — maʼnaviyat ko‘zgusi, insonni kamolot sari yetaklovchi bebaho xazinadir. Bugungi kunda mamlakatimizda Muhtaram Prezidentimiz tashabbusi bilan kitobxonlikni targ‘ib etish, yosh avlodning mutolaaga bo‘lgan qiziqishini oshirish davlat siyosatining ustuvor yo‘nalishlaridan biriga aylandi.

Jamiyatda kitobxonlik muhitini mustahkamlash borasidagi xayrli ishlarda huquqni muhofaza qiluvchi organlar vakillari ham faol tashabbus ko‘rsatmoqdalar. Xususan, Soʻx tumani prokurori Sadirali Mirzokarimov tashabbusi bilan tumandagi 1-sonli ixtisoslashtirilgan davlat umumtaʼlim maktabida (IDUM) yangi va zamonaviy maktab kutubxonasi barpo etildi.

Mazkur maʼnaviyat maskani qisqa fursat ichida to‘liq qurib bitkazildi va foydalanishga topshirildi. Bugungi kunda kutubxona fondi 2 000 tadan ortiq turli sohalarga oid badiiy, ilmiy va ommabop adabiyotlarni o‘z ichiga olgan bo‘lib, o‘quvchilar va kitobsevarlarning sevimli maskaniga aylandi.

Kutubxonaning tashkil etilishi quyidagi maqsadlarga xizmat qiladi:
• Yoshlar o‘rtasida mutolaa madaniyatini yuksaltirish;
• O‘quvchilarning bo‘sh vaqtlarini mazmunli tashkil etish;
• Tuman aholisi va maktab jamoasi uchun zamonaviy maʼnaviy hordiq maskani yaratish.

Tuman prokurorining ushbu xayrli va savobli amali nafaqat maktab jamoasi, balki keng jamoatchilik tomonidan yuqori baholanmoqda. Bilimga chanqoq yoshlar uchun yaratilgan bunday imkoniyat kelajakda yurt koriga yaraydigan, maʼnan boy avlodni tarbiyalashda muhim poydevor bo‘ladi.

Biz ham maʼnaviyat va maʼrifat yo‘lida fidokorlik ko‘rsatayotgan tuman prokuroriga kelgusi faoliyatida ulkan zafarlar, yangidan-yangi muvaffaqiyatlar tilab qolamiz.

Soʻx tumani hokimligi Axborot xizmati