Саховатпеша инсонлар туфайли бир оила янги хонадон соҳиби бўлди
2022-06-30 17:59:13 132
Саховатпеша инсонлар туфайли бир оила янги хонадон соҳиби бўлди
Аввал хабар берганимиздек, Навобод маҳалла фуқаролар йиғинида яшовчи Амирбек Нисоевлар хонадони бошпанасиз қолиб, “Сўх” ширкат хўжалиги ҳудудидаги дала шийпонларнинг бирида яшаб келишган ва бу хонадон бевосита туман секторлари раҳбарлари томонидан ўрганилиб, уларга уй-жой қуриб бериш учун келишиб олинган эди. Асосий муаммо уй қуриш учун ер майдони йўқлиги бўлган ва бу муаммо ҳам саховатпеша инсонлар туфайли ўз ечимини топди.
Навобод маҳалласида яшовчи, Сўх тумани ички ишлар бўлими жамоат хавфсизлиги хизмати, жамоат тартибини сақлашни ташкиллаштириш бўлими инспектори Дадахон Ҳидоятов ўзининг тасарруфидаги томорқадан 0,8 сотих ер майдонини ушбу оилага ўз розилиги билан берган.
Сўх тумани ҳокимлиги, тумандаги барча секторлар раҳбарлари, Малбут маҳалласи аҳолиси ва айниқса, ички ишлар бўлими ходимларининг саъй-ҳаракатлари ва ташаббуслари билан мазкур оилага уй-жой қуриш бўйича ишлар бошланиб кетди ва бир неча ой давомида ташкил этилган ҳашарлар туфайли янги уй Малбут маҳалласи ҳудудида қад ростлади.
- Мазкур хайрли ишларда бизга маҳалла аҳли, бевосита туман ҳокими, ички ишлар бўлимининг шахсий таркиби, секторлар раҳбарлари, саховатпеша инсонлар яқиндан ёрдам бердилар. Яхши ниятлар билан қилинган эзгу ишлар ўз мевасини берди. Биз барча бизга елкадош ва кумакдош бўлган инсонларга самимий миннатдорлик изҳор этамиз, - дейди Сўх туман ички ишлар бўлими ХПБ ХКМБ катта инспектори, подполковник Шаҳноза Шодмонова.
Навобод маҳалласида янги уй-жойларни ўз эгаларига топширишга бағишланган тадбир бўлиб ўтди. Тадбирда иштирок этиб сўз олган туман ҳокими Сайидбаҳром Сайидмусаев мазкур хайрли ишга бел боғлаб, ташаббус кўрсатган барча саховатпеша инсонларга миннатдорлик билдириб, хонадон эгаларига уй-жой калити ва қимматбаҳо совға – телевизор тақдим этди.
Бундай совға ва эътибордан мамнун бўлган хонадон соҳиблари – Амирбек ва Санобархон Нисоевлар ва уларнинг уч нафар фарзанди – икки ўғил ва бир нафар қизлари барча саховатпеша инсонларга самимий миннатдорлик изҳор этдилар.
Дарҳақиқат, меҳр-оқибат, саховат, яхшилик, эзгу ишларда бир бўлиб фаолият олиб бориш, айни инсонларга наф келтириш олий бахт эканлиги мана шундай хайрихоҳлик амалларида ўз ифодасини топмоқда. Айтиш лозим, инсон бор экан, одамзот фарзанди барҳаёт экан, одамийлик ва эзгу амаллар, инчунин саховат, хайрихоҳлик, қўли ва йўли очиқлик каби фазилатлар мангу қолажак.
Сўх тумани ҳокимлиги Ахборот хизмати
