Хайрли ташаббусларнинг ижобий самараси
2020-06-27 20:04:53 151
Хайрли ташаббусларнинг ижобий самараси
Бугун туманнинг қай бир гўшасига борманг, ободлик ва бунёдкорлик ишларининг авж олганига гувоҳ бўласиз. Кундан-кунга қишлоқлар қиёфаси ўзгариб, аҳоли яшаш тарзи фаровонлашиб боряпти. Давлатимиз раҳбарининг хайрли ташаббуси, инсон манфаатига каратилган ҳаёбахш ислоҳотлар Сўх туманида ўз аксини топмоқда. Буни йўл қурилиши ва таъмирлаш ишларида ҳам яққол кўришимиз мумкин. Баҳорда ва қишда лой, ёз ва куз фаслида асосан тупроқ бўлган йўллар ўрнини эндиликда замонавий тарзда қурилган бетонли қоплама ва асфальтланган кўчалар эгалламоқда.
Кеча Ҳушёр маҳалласидаги Зиё кўчаси тўлиқ асфальтланган бўлса, бугун бетонли қоплама ётқизиш ишлари Сариканда маҳалласининг Чорадара кўчасида бошланиб кетди. Муаммо ва камчиликлар гирдобидан босқичма-босқич қутулаётган туман аҳли берилаётган юксак эътибор ва ғамхўрликлардан мамнун, хурсанд.
Туманда йўл қурилиши ва таъмирлаш ишларига жами 123 нафар мутахассис ва ишчилар жалб этилган бўлиб, вилоят марказидан келтирилган 20 та замонавий техника йўлсозлар мушкулини осон қилаётир.
Тадбир бошидан Сариканда, Қақир, Ленбур, Девайрон, Навобод маҳаллаларидаги яқин 12 000 метр бўлган тупроқ қопламали йўллар шағаллаштирилган бўлса, юқорида номлари қайд қилинган ҳудудлар, шунингдек, Чашма, Шарқобод, Янгиариқ, Офтобру, Гулистон маҳаллаларида 12 000 метрдан ортиқ бўлган шағал қопламали йўлларга цементобетон қопламаси ётқизилди. Ҳудуддаги ички йўлларни асфальтлаштириш ишлари ҳам жадаллик билан давом этаяпти. Шу кунгача “Риштон-Сух”, “Тул-Ғазнов” йўналишидаги, шунингдек, Навобод, Ҳашёр, Девайрон, Сариканда маҳаллаларидаги қарийб 5 000 метр масофага асфальт қопламаси ётқизилди. Шуни ҳам алоҳида таъкидлаш лозимки, ҳар бир ҳудуд хусусиятидан келиб чиққан ҳолда маҳалла ва қишлоқларда пиёдаларга шароит яратиш мақсадида цементобентонли пиёдалар йўлакчаси қурилиши ва бетонли бордюларнинг монтаж қилиш ишлари ҳам олиб борилмоқда. Мисол учун, тадбир бошидан Ҳушёр-Ровон автомобиь йўлининг Ҳушёр-Сариканда маҳаллалари оралиғида 2 000 метрга квадратга яқин цементобетонли пиёдалар йўлакчаси қурилиб, 1 000 метр квадратга тенг масофадаги йўлларга бетонли бордюрлар монтаж қилинди.
Бугун Девайрон маҳалла фуқаролар йиғини, “Маърифат” кўчасида яшовчи фуқаролар учун унутилмас кун бўлди десак, муболаға эмас. Мазкур кўчага асфальт ётқизиш ишлари охирига етиб, фойдаланишга топширилди. – “Барча Девайрон аҳолиси, айниқса “Маърифат” кўчасида истиқомат қилувчи аҳоли бундай эътибор ва ғамхўрликлардан миннатдор ва мамнун. Дарҳақиқат, бугунги кунгача бизнинг қишлоққа шунчалик эътибор бўлмаган. Бугун биз учун ҳақиқий байрам. Болалар, фарзандларимиз қувончини кўрмайсизми, энди улар бемалол лой бўлмасдан мактабга бориб келишади. Шунчалик эътибор учун Юртбошимизга маҳалла аҳлининг миннатдорчилигини билдираман”, - дейди маҳалла раиси Раҳмонали Бобоев.
Республикадан келган йўл қурилиши мутасаддийлари, туман ҳокимлиги ваккиллари ва маҳалла аҳли иштирокидаги бўлиб ўтган тадбир ҳақиқий байрам кечасига айланиб кетди. Туманда ободонлаштириш ва бунёдкорлик ишлари давом этмоқда.
Сух тумани ҳокимлиги Ахборот хизмати
