1. Бош сахифа
2. Янгиликлар

ФИРИБГАРЛАР ТУЗОҒИДАН ОГОҲ БЎЛИНГ!

×

Фирибгарлар тузоғидан огоҳ бўлинг!

Фарғоналик Зафарова Муштарий (исм, фамилиялар ўзгартирилган)

2 нафар фарзанднинг онаси. Ҳали ёш бўлишига қарамай, бир неча бор судланган. Бир хатога қўл ургач, у ўз ҳаётининг осуда дамларини қадрлаб, ҳалол меҳнатга қўл урмади. Аксинча, қайта-қайта “қоронғи йўл”ларга кираверди. Фирибгарлик қилиб ўзгаларнинг мол-мулкини ўзлаштириш пайида “тадбиркор”, “сотувчи” қиёфаларида турли хийлаларни ўйлаб топди. 

Жумладан, 2019 йилнинг март ойида П.Саиданваровнинг ишончига кириб, унга ўзи ишлаётган жойдаги ишчиларга хизмат кийимлари ва бошқа маҳсулотлар кераклигини айтиб, 11.500.000 сўмлик маҳсулотларини фирибгарлик йўли билан қўлга киритган. Бу билан чекланмай, ўзининг жиноий ҳаракатларини давом эттириб, 2020 йил декабрь ойида М.Рўзиохуновани яшаш хонадонига бориб, ўн кун ичида пулини бериш шарти билан ишончига кириб, алдаб, жами 5.143.000 сўмлик кийим-кечак ва парфюмерия маҳсулотларини олади. Кейинги “ўлжаси” Ш.Рўзиохунова бўлди. Унинг савдо дўконига бориб, пулини бир ой муддатда бўлиб-бўлиб бериш шарти билан 35.000.000 сўмлик кийим-кечакларини В.Сиддиқовни 9.500.000 сўмлик колбаса маҳсулотларини қўлга киритиб, чув тушириб кетади.  “Касби”ни ҳадисини олган устамон шунчалик берилиб кетадики, Н.Алижоновнинг савдо дўконидаги 9.000.000 сўмлик 12 дона велосипедларини, Ф.Абдуҳалиқованинг 25.500.000 сўмлик мебелларини, И.Холматовнинг  16.000.000 сўмлик турли хилдаги болалар ўйинчоқларини  “кўрдим демайди”.

Х.Мамажоновга эса ўзини катта савдо дўконларига кир ювиш маҳсулотларини тарқатиш билан шуғулланувчи фирма эгаси сифатида таништиради. Сотилган кир ювиш маҳсулотлари учун бонус тариқасида дўконларга спорт анжомларини тарқатишини айтиб, унинг 107.600.000 сўм миқдоридаги спорт анжомларини қўлга киритади.

Ш.Зулпиқоровага ўзини фитнес клуб очаётганини айтиб, пулини узоғи билан бир ҳафтада беришига ишонтириб, 24.800.000 сўмлик фитнес анжомларига эга чиқади.

 Аммо, олғирнинг қилмишлари кўпга чўзилмади. У судда мазкур йўлга киришига фарзанди касаллигини, пулларни уни даволатишга сарфлаганини айтиб, қилмишидан пушаймонлиги, қонуний енгиллик беришини сўрайди.

Суд, судланувчига Ўзбекистон Республикаси ЖКнинг тегишли моддаларига асосан озодликдан маҳрум қилиш ҳамда жарима жазоси тайинлаб, жабрланувчилар фойдасига жами 202.400.000 сўм моддий зарар ундиришни белгилади.

М.Иномхонов - Фарғона вилоят судининг судья катта ёрдамчиси

Бизни ижтимоий тармоқларда кузатинг
Facebook | Telegram | Telegram murojaat | Youtube | Instagram