ОРАМИЗДАГИ ОДАМЛАР
2023-05-30 14:58:36 160
Орамиздаги одамлар
Орамизда турли соҳаларда фаолият юритиб, туманимиз шарафини барча жабҳаларда муносиб ҳимоя қилаётган юртдошларимиз бор. Сўх тумани фавқулодда вазиятлар бўлими ФВДТ ва ФМ бўлинмаси бошлиғи Фархиддин Саидов мана шундай ёшларимиздан.
Аслида Риштон тумани Қошқайрон маҳалласида туғилиб ўсган Фархиддин вазифа тақозоси туфайли туманимизнинг фавқулодда вазиятлар бўлимида фаолият олиб боради. – Уч йилдан бери Сўх туманида фаолият олиб бораман. Аслида Риштон билан Сўхни мустаҳкам ришта бир-бирларига боғлаб туради, бу бирдамликдир. Ўзбекистоннинг ҳар бир гўшаси биз учун Ватан ва ушбу Ватан қудрати ва ривожига ҳисса қўшиш биз фарзандларнинг асосий вазифамиздир. Ҳаётда нимага эришган бўлсам, онажоним туфайли, онажоним бизнинг бахтимизга соғ-омон бўлсинлар, - дейди биз билан суҳбатда Фархиддин Саидов.
Фархиддин яқинда Тошкент шаҳрида ўтказилган Ўзбекистон Қуролланган кучлари ва куч ишлатувчи тузилмалар вакиллари, ҳарбий таълим муассасалари курсантлари, профессионал спортчилар ва спорт ҳаваскорлари иштирокида, “Мен ғолиб” ҳарбий-ватанпарварлик оммавий югуриш мусобақасида иштирок этиб, совриндор бўлди.
“Хурсандчилик келса, қўшалоқ келади” деганларидек, Фархиддин Саидовнинг онажониси Бибиойшахон Саидовага вилоятимизда ўтказилган “Оналарга эҳтиром” фестивалида вилоят ҳокими томонидан “Энг яхши мутахассисларни тарбиялаган она” номинациясида диплом ва қимматбаҳо совға тақдим этилди.
Оила мустаҳкамлиги ва унинг тинчлиги албатта, мана шундай инсонлар қўлида. Мана шундай мустаҳкам оилалар ва Ватанга содиқ фарзандлар сони кўпаяверсин.
Сўх тумани ҳокимлиги Ахборот хизмати
Бизни ижтимоий тармоқларда кузатинг
Facebook |
Telegram |
Telegram murojaat |
Youtube |
Instagram
