Сўх туманида “Янги Ўзбекистон ёшлари, бирлашайлик!” шиори остида ёшлар кунига бағишлаб тантанали тадбир бўлиб ўтди
2022-06-30 18:53:33 136
Сўх туманида “Янги Ўзбекистон ёшлари, бирлашайлик!” шиори остида ёшлар кунига бағишлаб тантанали тадбир бўлиб ўтди
Ёшлар - куч, ёшлар - шижоат, ёшлар - эртанги кунимиз ворислари, давомчилари. 30 июнь - ёшлар кунига бағишлаб туман марказий ўйингоҳида тантанали тадбир бўлиб ўтди. Чиройли безатилган саҳна байрам иштирокчиларга байрамона кайфият улашди десак, асло муболаға қилмаган бўламиз.
Туман ҳокимлиги, Ўзбекистон Ёшлар ишлари Агентлиги Сўх тумани бўлими, туман маданият бўлими, Ёшлар Иттифоқи, туман маънавият ва маърифат маркази ҳамкорлигида тайёрланган адабий-бадиий композиция томошабинлар кўнглидан жой олганига асло шубҳа йўқ.
Тадбирда туман ҳокими Сайидбаҳром Сайидмусаев, туман сектор раҳбарлари иштирок этишди. Туман ёшларини бу унутилмас кун билан табриклаб, туман ҳокими Сайидбаҳром Сайидмусаев Сўх ёшлари ҳам бугун давлатимиз раҳбари томонидан берилаётган эътибордан баҳраманд бўлаётганликларини қайд этиб, туманда Президент қарор ва Фармонлари асосида ёшларга қулай ва зарурий шарт-шароитлар яратиб берилгани ҳақида алоҳида тўхталди.
Сўх тумани ҳокимининг ёшлар сиёсати, ижтимоий ривожлантириш ва маънавий-маърифий ишлари бўйича ўринбосари вазифасини вақтинча бажарувчи Илҳом Абдумажидов ҳам ўз табригида ёшларга берилган чексиз имкониятлар ва бу имкониятлардан самарали фойдаланиш лозимлигини қайд этди.
- Бу йили маҳалалларда фаолият олиб бораётган барча ёшлар етакчиларига компьютер жамланмалари, спорт анжомлари тақдим этилди. Берилаётган эътибор ёшларимизни янада самаралироқ фаолият олиб боришларига замин яратади, - дейди Ўзбекистон Ёшлар ишлари Агентлиги Сўх тумани бўлими бошлиғи Исожон Мастонов.
Тадбир давомида барча ёшлар етакчиларига ва мазкур тизимга ҳамкор фаолларга эсдалик ва қимматбаҳо совғалар топширилди. Совғаларни ўз эгаларига туман ҳокими ва сектор раҳбарлари тақдим этдилар.
Тадбирнинг бадиий қисмида вилоятимиз марказидан келган ёш санъаткорлар ва санъат усталари тадбир иштирокчиларига ўзларининг кўй ва қўшиқлари ила янада кўтаринкилик бағишлашди. Файзулло Зокиров, “Карвон” гуруҳи, Динор Ализода ва Абдужалил Қўқонов томонидан ижро этилган қўшиқлар барчани рақс этиш ва хурсандчилик қилишга ундади. Ёшлар куни тадбири катта байрам тантанасига уланиб кетди.
Хуллас, Ёшлар куни вилоятимизнинг энг чекка ва кенжа тумани Сўхда катта тантана ва кўтаринкилик билан қайд этилди. Туман ҳокимлиги байрамни катта тантана сифатида нишоналшга эришган барча ҳамкор ташкилотларга ўз миннатдорчилиги изҳор этади.
Сўх тумани ҳокимлиги Ахборот хизмати
