“Аҳоли бандлиги тўғрисида”ги Қонуннинг мазмун-моҳияти ва аҳамияти (ЎРҚ–642, 20.10.2020 й).
2020-11-06 14:04:36 293
“Аҳоли бандлиги тўғрисида”ги Қонуннинг мазмун-моҳияти
ва аҳамияти (ЎРҚ–642, 20.10.2020 й).
I. Қонуннинг мақсади
Аҳоли бандлиги соҳасидаги муносабатларни тартибга солишдан иборат.
Аҳолининг бандлигини таъминлашга оид қатор масалалар Қонун даражасида белгиланди. Жумладан:
• аҳоли бандлигини рағбатлантириш ва тадбиркорликка жалб этиш учун субсидия, грант ва кредитлар ажратиш;
• ҳар йили иш ўринларини ташкил этишга доир давлат буюртмасини шакллантириш;
• маҳаллий меҳнат органлари томонидан иш қидираётган ва ишсиз шахсларга кўрсатиладиган хизматлар турлари;
• иш қидираётган шахсларни маҳаллий меҳнат органлари томонидан рўйхатга олиш ва ҳисобдан чиқариш тартиби;
• “Ягона миллий меҳнат тизими” идоралараро дастурий-аппарат комплексини юритиш;
• меҳнат стажини электрон тарзда ҳисобга олиш.
Бандлик ва меҳнат муносабатлари вазирлиги аҳоли бандлиги соҳасидаги ваколатли давлат органи ҳисобланади.
Қонун билан Меҳнат кодексига бир қатор ўзгартиришлар киритилди. Жумладан, ишсизлик нафақаси 12 ойлик давр ичида кўпи билан 26 ҳафта давомида тўланиши белгиланди (амалда ишламаган ва биринчи марта иш қидираётган шахсларга 13 ҳафта, бошқа тоифадагиларга 26 ҳафта мобайнида тўланади).
Қонунга кўра, ишсизлик нафақаси миқдори қуйидагича оширилади:
ишдан ва иш ҳақидан (меҳнат даромадидан) сўнгги 12 ойлик давр ичида маҳрум бўлган шахсларга – аввалги иш жойидаги ўртача ойлик иш ҳақининг 50 фоизи миқдорида, лекин меҳнатга ҳақ тўлашнинг энг кам миқдори (МҲЭКМ – 679 330 сўм)дан оз бўлмаган миқдорда (амалда МҲЭКМнинг 35,2 фоизидан оз бўлмаган);
ишдан ва иш ҳақидан (меҳнат даромадидан) маҳрум бўлган ҳамда узоқ (1 йилдан ортиқ) танаффусдан кейин меҳнат фаолиятини қайта бошлашга ҳаракат қилаётган шахсларга – МҲЭКМнинг 1 баравари миқдорида (амалда МҲЭКМнинг 26,5 ва 35,2 фоизидан оз бўлмаган миқдорларда);
илгари ишламаган, биринчи марта иш қидираётган шахсларга – МҲЭКМнинг камида 75 фоизи миқдорида (амалда МҲЭКМнинг камида 26,5 фоизи миқдорида).
Қонун расмий эълон қилинган кундан эътиборан 3 ой ўтгач кучга киради.
