O‘zbekiston tumanida oila va xotin-qizlar bo‘limi tomonidan Prezidentimizning 2025 yil 14 martdagi “Oila va xotin-qizlarni qo‘llab-quvvatlash tizimini yanada takomillashtirish chora-tadbirlari to‘g‘risida”gi qarori ijrosi va uning mazmun-mohiyatiga bag‘ishlangan seminar tashkil etildi.

Nuroniy onaxonlar, tadbirkor ayollar, xotin-qizlar faollari, daxldor muassasalar va jamoatchilik vakillari ishtirok etgan seminarda ta’kidlanganidek, bugun mamlakatimizda xotin-qizlarni har tomonlama qo‘llab-quvvatlashga qaratilgan islohotlar yangi bosqichga ko‘tarildi.

Seminarda davlatimiz rahbarining qaroridan kelib chiqadigan vazifalar, xususan “Hamroh” tadbirkor ayollarni qo‘llab-quvvatlash dasturi va uning ijrosi, kelgusida amalga oshiriladigan ishlar to‘g‘risida ishtirokchilarga batafsil tushunchalar berildi.

Tadbir davomida ishsiz xotin-qizlar bandligini ta’minlashga ko‘maklashish maqsadida mehnat yarmarkasi ham o‘tkazildi.

Mutaxassislar “To‘g‘ri ovqatlanish va sog‘lom turmush tarzi” mavzusida chiqishlar qilib, hunarmand va tadbirkor xotin-qizlar tomonidan ishlab chiqarilgan mahsulotlar namoyish etildi.